Nýjar fréttir.

Fengum símtal frá lækni áðan sem fór aðeins betur yfir þá niðurstöðu sem hann fékk eftir skoðun á myndunum sem teknar voru af höfðu Þuríðar í apríl. Í stuttu máli þá er staðan (eins og er) ekki alveg eins slæm og hún hljómaði eftir stutt símtal við hann sl. laugardag. Það er einhver blettur sem er í kringum 2mm að stærð sem vakti athygli hans núna og í fyrstu vissi hann ekki nema þetta væri nýr blettur sem hefði myndast. Myndirnar sem teknar voru síðast sýna hins vegar aðe...ins annað sjónarhorn af svæðinu en áður hefur sést og er læknirinn nú sannfærður um að þetta sé ekki nýr blettur heldur sami og áður (innan gamla æxlissvæðisins). Semsagt pínulítill blettur (rétt rúmlega títuprjónshaus) sem hefur verið til staðar en sést hins vegar skýrar núna því myndin er tekin frá örlítið öðru sjónarhorni (sneiðist öðruvísi).

Læknarnir hafa alltaf og munu alltaf hafa áhyggjur af því að mein Þuríðar geti tekið sig upp aftur og því eru þeir vel á tánum ef þeir sjá eitthvað nýtt sem gæti verið óeðlilegur vöxtur í.
Það verða teknar aftur myndir í ágúst og ástæðan fyrir því að það er ekki gert fyrr er að læknarnir telja að það gefi í raun engar nýjar upplýsingar að taka myndir strax aftur – og þeir telja þetta ekki vera akút – sem er auðvitað bara jákvætt.

Í framhaldi af næstu myndatökum verður tekin ákvörðun um hvort eitthvað þurfi að bregðast við. Þá verður metið hvort þessi blettur sé að stækka eða hvort þetta séu einhverjar leifar sem eru til friðs. Ef þetta er að stækka þá mun Þuríður aftur verða send í gammageislatækið í Svíþjóð og telur læknirinn engar líkur á öðru en að það verði góður árangur af þeirri meðferð – með litlum aukaverkunum.

Við erum auðvitað mjög ánægð með að þetta lítur ekki alveg eins illa út og það gerði um helgina en samt sem áður er þetta áminning til okkar um að fullur sigur mun líklega aldrei nást þrátt fyrir að góður árangur geti náðst í einstaka orustum. Við þökkum þá fyrir það að læknar Þuríðar eru á tánum og tilbúnir að taka upp bardagatækin þegar á þarf að halda.

Vona að þetta sé ekki of flókin útskýring á frekar flóknum hlutum. Takk fyrir allar góðar kveðjur og hugsanir sem hjálpa okkur að halda í vonina um að þetta hafi aðeins verið „false alarm“ – það fáum við að vita í ágúst.

Athugasemdir

[Helga (IP-tala skráð) 7.5.2014 kl. 16:38]

Góðar baráttukveðjur

[Birna S. Jónsdóttir (ókunnug) (IP-tala skráð) 7.5.2014 kl. 17:05]

Krossa alla mína fingur og tær fyrir ykkur, það er það minnsta sem maður getur gert. Þið eruð samt ein flottasta fjölskylda sem ég veit um þrátt fyrir að þekkja ykkur ekkert, en þið getið kennt okkur hinum svo margt og minnt okkur á hvað skiptir mestu máli í lífinu. Ég held í vonina með ykkur - eins og alltaf :)

[Þórleif (IP-tala skráð) 8.5.2014 kl. 07:51]

Frábært, vonum það besta. Megið þið hafa gott og gleðilegt sumar með fullt af skemmtilegheitum :)

[Steinunn (ókunnug) (IP-tala skráð) 8.5.2014 kl. 10:40]

Krossa fingur fyrir ykkur. Er viss um að allt kemur vel út í ágúst. Gott að hafa lækna sem eru vel með á nótunum og passa upp á allt. Þú minnir mann svo sannarlega á hvað það er sem skiptir mestu máli í lífinu. Bestu kveðjur.

[Johanna Karlsdottir (IP-tala skráð) 11.5.2014 kl. 03:13]

Gangi ykkur sem allra best. Þið eruð ótrúleg fjölskylda :) Takk fyrir að leyfa okkur öllum að fylgjast með ykkur. Njótið sumarsins og ég er viss um að þið fáið góðar fréttir í ágúst.

[Sólveig (IP-tala skráð) 12.5.2014 kl. 00:30]

Elsku fallega Stórfjölskylda.

Sendi ykkur fangið fullt af óskum og vonum um að þetta verði mun betra en horfir.

Enda bendir seinni færslan til að svo sé. Guði sé lof.

RISAKNÚS í hús !!

[Didda ókunn (IP-tala skráð) 12.5.2014 kl. 19:24]

kossar og knús og góðar óskir ævinlega :)

[Sigrún Helgadóttir (IP-tala skráð) 13.5.2014 kl. 22:35]

úff það sem er á ykkur lagt :/ krossa putta, sendi ykkur baráttustrauma, hugsa til ykkar og vona það besta ! STÓRT knús á ykkur hetjurnar!! :)

[Edda Hlíf Hlífarsdóttir (IP-tala skráð) 16.5.2014 kl. 22:43]

Kærleikskveðjur! <3