Slauguspjall

Núna er sú allra flottasta í Reykjadal og nýtur sín væntanlega í botn - gat ekki verið meira sama þegar foreldrarnir kvöddu hana en mamma saknar hennar alveg gífurlega mikið.

Annars á hún að fara í aðgerð 12.ágúst - það fundust tvær "blöðrur" í síðustu myndatökum hjá tannréttingatannlækninum hennar sem þarf að fjarlægja sem fyrst en kjálkaskurðlæknirinn getur ekki sagt hvort þetta tengist hennar veikindum eða ekki fyrr en í aðgerðinni.  Í þessari aðgerð þarf að fjarlægja tennur til þess að komast að þessum "blöðrum" og það gæti verið að það væru líka fullorðinstennur en vonandi ekki samt.  Það tekur 10 vikur fyrir sjúkratryggingar að samþykkja þessa aðgerð þar að segja hvort þeir borgi hana eða við en það er því miður ekki hægt að bíða svo lengi og ef þeir samþykkja hana ekki þá liggjum við bara í "súpunni".  Læknirinn sagði reyndar að það væri fáránlegt ef þeir samþykktu ekki þar sem þetta er eitthvað sem ÞARF að gera en þanga til ætlum við ekki að hafa neinar áhyggjur af þessum "blöðrum" eða sjúkratryggingum - ætlum bara að njóta þess að vera til og gera eitthvað skemmtilegt þanga til.

Get samt ekki beðið eftir að fá hana úr Reykjadalnum - við erum ofsalega dugleg að hreyfa okkur fyrir maraþonið en hérna er ein mynd frá einni Esjuferðinni okkar sem krakkarnir elska að fara. Þau "drösla" mömmunni upp sem er stundum alveg að "andast" á leiðinni - reyndar skokkar Blómarósin mín léttilega upp og tekur nokkrar pásur svo hún verði ekki alveg langt á undan okkur hinum

Næstu rannsóknir Þuríðar minnar verða 6.ágúst en þanga til ætlum við að njóta lífsins og gera endalaust marga skemmtilega hluti í júlí.

Heyrumst í ágúst..... 

Þuríður Arna mín er krampandi nánast daglega þessa dagana og hún er ofsalega þreytt þrátt fyrir að vera í afslöppun allan daginn - hún telur samt dagana í Reykjadal sem ég vona svo heitt og innilega að hún muni njóta í botn.

Við fjölskylda eyddum helginni uppá Skaga þar sem Gull-drengurinn okkar var að keppa á Norðurálsmótinu og stóð sig hrikalega vel, mamman er allavega endalaust stollt af honum (einsog öllum hinum).  

Hérna eru tvær frá helginni:

 

Þuríður Arna mín fékk yndislegan afmælisdag - gæti ekki verið hamingjusamari með hann.  Hún er svo heppin að hafa verið með ótrúlega flottum stelpum í bekk í gamla skólanum sínum sem hún bauð í veislu til sín (14 stelpur) sem komu allar og gerðu daginn hennar ennþá betri.  Þar sem hún er ekki flutt úr hverfinu en samt komin í annan skóla þá reynum við að halda tengslunum við þær enda hrikalega góðar við hana - þó svo hún sé ekki að tengjast þeim á "bestu vinkonu hátt" þá gæti hún ekki verið heppnari.  Jú hún er langt á eftir þeim í þroska en það hefur samt ekki stoppað þær að vera svona við hana einsog þær eru - alltaf tilbúnar að leyfa henni að vera með, gera ekki grín af henni ef hún getur ekki eitthvað og svo lengi mætti telja.  Greinilega vel uppaldar þessar stelpur :) Þeim finnst greinilega ekkert sjálfsagðara en að gleðjast með henni.

Við grilluðum hamborgara handa þeim, þær grilluðu sér sykurpúða, fóru í ratleik um hverfið og þar spretti Þuríður Arna með þeim um hverfið - ótrúlega gaman að sjá hvað hún var dugleg í þeim leik.  Held að þær allar hafi skemmt sér jafn vel og Þuríður mín.

Fréttir af Þuríði minni - þá er hún ennþá krampandi, of oft að mínu mati.  Hún er alveg fljót að þreytast og leggur sig oft þegar hún kemur til afa síns eftir skóla.  Auðvidað er ég með STÓRAN hnút (það er stór stór steinn í honum sem mig verkjar í daglega) í maganum yfir agúst-mánuði en við ætlum að njóta þess að vera til þanga til og vonandi hverfur hnúturinn þá.  Hún telur niður dagana í Reykjadalinn.

Set svo inn tvær myndir - önnur er af stelpunum í afmæli Þuríðar minnar, grillandi sykurpúða og hin er af DraumaDísinni okkar sem er dýrkuð og dáð af öllum á heimilinu.