"mamma viltu knúsa mig"

Þetta sagði Þuríður mín Arna við mig í morgun þegar við vorum að gera okkur reddí og að sjálfsögðu fékk hún fast og gott knús enda er ég ekki vön að spara þau við börnin mín eða Skara minn og segi við þau á hverjum degi hvað ég elska þau mikið.  Theodór minn er líka farinn að segja á móti "elkaði ika", bara yndislegastur.  Stelpurnar mínar eru nú farnar að segja þetta þó ég segi þetta ekki við þær, sérstaklega þegar ég knúsa þær bless þegar ég er að fara eitthvað og þegar þær eru að fara sofa.  Mestu krútt!

Í dag er mömmudagur hjá okkur Þuríði minni.  Byrjuðum daginn á því að fara í hjálpartækjastöðina hjá tryggingastofnun og mátuðum kerru fyrir hetjuna mína.  Fáum þessa fínu og flottu kerru sem hún getur hvílt lúinn líkama, hjólastóllinn er ekki alveg nógu góður fyrir hana því hún þarf að geta lagst útaf og sofnað.  Reyndar fáum við ekki þessa kerru fyrr en eftir sirka fimm vikur því það er svo mikið að gera þarna, hún er samt alveg reddí þannig séð nema það er eftir að þrífa hana.  Hrikalega langur tími að þrífa einn hlut?

Kíktum í Toys'rus og skoðuðum allt dótið sem henni finnst æði, hún átti líka að velja jólagjöf handa Oddnýju systir sinni Erlu.  Reyndar var ég búin að velja það eða reyndi að benda henni á einn ákveðin hlut en það kom sko ekkert annað til greina en playmo eheh!!  Það var ekki það sem ég var búin að velja en hún stóð hörð við það og að sjálfsögðu fékk hún að ráða.  Hún veit að systir sín elskar playmo og vill greinilega bara gefa henni það sem hún veit að hún verður ánægð með, well ég veit þær báðar yrðu ánægðar með sokkapar.  Ótrúlega gaman að sjá hvað hún var samt hörð við það sem henni langaði að gefa henni.

Við erum farin að sá miklar þroskaframfarir hjá Þuríði minni, hún er farin að sýna meiri tilfinningar en áður.  Vanalega hefur hún ekki verið að sýna miklar tilfinningar enda ö-a erfitt ef maður er uppdópaður hálfan sólarhringinn.  En í dag eru miklar framfarir.  Æðislegt að horfa á.

Hún er reyndar dáltið þreytt þessa dagana, meira en venjulega.  Þó hún taki sinn dýr yfir daginn er einsog hún nái ekki að ná þeirri þreytu úr sér og er alveg þreytt frammað kvöldmat eða þanga til hún fer aftur að sofa fyrir nóttina.  Hún er einmitt núna nýkomin frammúr en við mæðgur ákváðum að vefja okkur inní sængina saman og kúrðum þar í klukkutíma, best í heimi að kúra sem fastast við börnin sín og alltaf þarf hún líka að leiða mig. Ótrúlega notanlegt.

Núna er hetjan mín að horfa á Shrek en hún fékk að velja sér einn cd tilefni dagsins og ætli hún horfi ekki á það þanga til við förum í leikskólann og náum í hin og mín mun kanski reyna læra oggupínu en það eru nú ekki nema tvær vikur þanga til ég er komin í rúman mánaðar jólafrí.  Víííí!! Hef einmitt mikið verið að pæla í því hvort ég eigi að taka fleiri fög eftir áramótin en í þessu fjarnámi sem ég er í á ég að taka fjögur fög einsog ég er í núna, æjhi þegar manni gengur svona vel langar manni alltaf í meira en kanski yrði það of mikið?  Veit ekki?

Eigið góða helgi kæru lesendur og takk kærlega fyrir fallegar hugsanir, verst að maður þarf að komast að því að eiga veikt barn til að vita hvað það býr gott fólk á þessum klaka.  Þið eruð yndislegust.

Enda þessa færslu á Heilræðavísum eftir Hallgrím Pétursson.

Ungum er það allra best
að óttast Guð, sinn herra,
þeim mun viskan veitast mest
og virðing aldrei þverra.

Hafðu hvorki háð né spott,
hugsa um ræðu mína,
elska Guð og gerðu gott,
geym vel æru þína.

Foreldrum þínum þéna af dyggð,
það má gæfu veita,
varast þeim að veita styggð,
viljirðu gott barn heita.

Hugsa um það helst og fremst,
sem heiðurinn má næra;
aldrei sá til æru kemst.
sem ekkert gott vill læra.

Lærður er í lyndi glaður,
lof ber hann hjá þjóðum,
hinn er ei nema hálfur maður,
sem hafnar siðum góðum.

Oft er sá í orðum nýtur,
sem iðkar menntun kæra,
en þursinn heimskur þegja hlýtur,
sem þrjóskast við að læra.

Vertu dyggur, trúr og tryggur,
tungu geymdu þína,
við engan styggur né í orðum hryggur,
athuga ræðu mína.

Lítillátur, ljúfur og kátur ,
leik þér ei úr máta;
varast spjátur, hæðni, hlátur,
heimskir menn sig státa.

Víst ávallt þeim vana halt:
Vinna, lesa, iðja;
umfram allt þó ætíð skalt
elska Guð og biðja.

Hallgrímur Pétursson
1614-1674

Athugasemdir

[Kristín (IP-tala skráð) 23.11.2007 kl. 14:19]

Ooh.  Þetta er svo yndislegt og margskilar sér segji ég ,bara í betri börnum að vera ófeimin að sýna þeim allann þann kærleik og ástúð sem maður á til.  Ég á eina 4 ára og við eigum reglulega saman mömmudag . Hafið þið góða helgi og Guð veri með ykkur.

[4 barna mamman (IP-tala skráð) 23.11.2007 kl. 16:15]

Falleg færsla frá fallegri konu! 

Eigið góða helgi fallega fjölskylda

knús 4 barna mamman

[Guðrún Jóhannesdóttir, 23.11.2007 kl. 16:17]

  yndisleg færslan hjá þér Áslaug min. Knús inn í kvöldið

[Kristín Amelía (IP-tala skráð) 23.11.2007 kl. 16:22]

Halló yndislega fjölskylda.

Vildi bara segja góða helgi og viljið þið knúsa litlu vinina mína frá mér. Er farin að sakna þess að sjá ekki fallegu brosin þeirra og fá gott knús. Njótið ykkar vel. Knús og kossar. Kristín Amelía.

[Dagrún (IP-tala skráð) 23.11.2007 kl. 19:46]

Góða helgi kæra fjölskylda

[Katrín Ósk Adamsdóttir, 23.11.2007 kl. 20:33]

Góða helgi elsku fjölskylda og knús til ykkar

[Kristín - ókunnug (IP-tala skráð) 23.11.2007 kl. 20:43]

Það sést vel á skrifum þínum hvað þú átt góð börn með stór hjörtu og þið greinilega góðir foreldrar. Að lesa þetta blogg beytir algjörlega hugsunarhætti manns.
Þessi lífsreynsla gerir þig/ykkur svo sterk og að manneskjum með aðrar og betri lífsskoðanir. 
Gangi ykkur allt í haginn.

[Bergdís Rósantsdóttir, 23.11.2007 kl. 22:26]

Æðislegt að þið hafið haft svona góðan dag.  Sammála þér um að það er ótrúlegt hvað það tekur langan tíma að fá hlutina frá hjálpartækjamiðstöðinni.  Beið einu sinni í tæpa 3 mán eftir hjólastól unglingsins úr viðgerð.  Eigið frábæra helgi.

knús og kram

[Hlynur Birgisson, 24.11.2007 kl. 10:19]

Þið eruð bara snilld öll,bestu helgarkveðjur frá Akureyri