Allt óljóst enn.

Óskar skrifar.
Jæja þá erum við búin að hitta læknana í morgun og ætla ég að reyna að segja ykkur aðeins frá því hvernig staðan er. Meginniðurstaðan er í rauninni sú að það er ljóst að það hafa orðið breytingar í æxlinu en á þessari stundu er útilokað að segja hvers vegna þær hafa orðið eða hvort þetta sé upphafið að frekari breytingum.  

Við höfum stundum talað um það hér að inni í sjálfu æxlinu séu einhverskonar vökvafylltar blöðrur og að svo virðist vera sem þær séu versti hluti þessa vefjar.  Breytingarnar sem eru að sjást núna eru á þessum blöðrum, þær eru að stækka.  En ummál æxlisins sjálfs er ekkert að breytast, þ.e. sem sagt ekki að þrýsta á neina aðra hluta heilans.  

Okkur var sagt í morgun að þó það væri líklegt að breytingarnar kæmu ekki af góðu þá væri samt sem áður ekki hægt að útiloka neitt og þar með er það ekki útilokað að um sé að ræða bólgur/bjúg sem myndast út af lyfjameðferðinni.  Þannig væri æxlið eða þessar blöðrur, að bregðast við áreiti lyfjameðferðarinnar og það í sjálfu sér gæti leytt til góðs til lengri tíma litið. En á hinn bóginn (og sennilega er það líklegra) gætu breytingarnar verið af slæmum toga og þá meina ég að þetta sé í raun að byrja að stækka og þá þorir maður ekki að velta því of mikið fyrir sér hvað það þýðir.  En þó fullyrða þeir læknarnir að það sé ekki inni í myndinni að æxlið breytist í illkynja þó það tæki upp á því að stækka.  

Næstu skrefin eru þau að krabbameinslæknarnir hér heima (í samráði við taugalæknana) þurfa að gera sér einhverjar hugmyndir um það hvort þeir vilji breyta lyfjameðferðinni og það ætla þeir að gera á næstu dögum.  Þá kemur það víst til greyna að gefa henni sterkari lyf sem þá væntanlega gætu haft meiri áhrif, bæði þá gagnvart meininu en einnig gæti það þá haft meiri áhrif á líðan Þuríðar á meðan á þessu stendur.  En þetta semsagt skýrist betur á næstu dögum.  

En Boston-læknarnir ætla einnig að vinna áfram í málinu þar sem þeir munu taka myndirnar með sér til Boston og skoða þær betur þar í samráði við sitt teymi og þar verður væntanlega skurðlæknirinn á meðal þar sem nauðsynlegt er að meta hvort breytingarnar hafi einhver áhrif á mögulega skurðaðgerð.    

Síðan mun Þuríður fara aftur í sneiðmyndatöku fyrr en áætlað hafði verið því að nú vilja þeir fá að sjá eins fljótt og hægt er hvort eitthvað meira sé að gerast.  Ef þetta heldur áfram að breytast þá gæti farið svo að frekari aðgerðarúrræði verði skoðuð fyrr en gert var ráð fyrir.   Þetta er semsagt allt í lausu lofti eins og þið getið lesið og eins og hjúkkan okkar sagði í morgun “það vesta er að við vitum ekki neitt”.  Og það er nákvæmlega málið, það hafa orðið einhverjar breytingar en svo virðist vera að útilokað sé að segja á þessari stundu hvers eðlis þær eru eða hverjar afleiðingarnar verða.  

VIÐ BARA BÍÐUM ÁFRAM.

Athugasemdir

[Hrafnhildur Ýr (IP-tala skráð) 19.6.2006 kl. 20:16]

Maður er hálf orðlaus eftir síðustu færslur ykkar. Get ekki sett mig í ykkar stöðu heldur rétt svo ímyndað mér hana. Baráttan heldur greinilega áfram og staðan, að mér skilst á ykkar skrifum, langt frá því að vera vonlaus, þó hún sé erfið. Nú er bara að halda baráttunni áfram með Þuríði Örnu. Það er auðvitað mjög auðvelt fyrir mann að segja fólki að halda áfram þegar svona fréttir berast, þar sem maður þarf ekki að standa í henni sjálfur, heldur einungis vera áhorfandi en það sem ég þekki af þessari fjölskyldu og hef lesið hjá ykkur þá eru þið öll búin að standa ykkur frábærlega síðan þessi barátta byrjaði og raunverulegar hetjur. Þið hafið kraftinn og viljann til að berjast áfram eins og ljón. Það litla sem ég get gert mun ég gera eins vel og ég get til að styðja ykkur þ.e. senda góða strauma og biðja fyrir ykkur öllum.

[Anna (IP-tala skráð) 19.6.2006 kl. 21:31]

Ég vona svo innilega að allt fari vel!