Eitt ár frá Bostonferð - einn dagur í þá næstu

Óskar skrifar

Í dag er eitt ár síðan við héldum í erfiðasta ferðalag sem við höfum farið í - nefnilega Bostonferðin þar sem Þuríður okkar fór í aðgerð.  Í dag er líka eitt ár síðan amma mín Jóhanna kvaddi þennan heim.  Við höfum oft sagt söguna af því þegar hún amma sagði daginn áður en við fórum til Boston að hún ætlaði að koma með okkur - hún dó 10 mínútum áður en flugvélin fór í loftið.
Það var hræðilega erfitt að fá ekki að fylgja ömmu síðasta spölinn en ég veit að þess í stað þá var hún með okkur í Boston og hún er með okkur enn.  Ég veit líka að hún elsku amma mín mun vernda hana Þuríði mína að eilífu - vonandi sem lengst hér í okkar lífi.

En jú þið lásuð rétt út úr fyrirsögninni, við ætlum að skella okkur til Boston á morgun en í þetta skiptið ætlum við ekki að stíga fæti inn á sjúkrastofnun.  Við ákváðum það nefnilega í fyrra að okkur langaði að fara einhverntíman til Boston án þess að fara þangað vegna veikinda dóttur okkar.  Síðan í kjölfarið af tónleikunum þá fórum við að hugsa um það hvað við gætum nú gert til að njóta lífsins sem best og okkur fannst þetta sannarlega tilvalið að skella okkur bara til USA - Ætlum að skilja Theodór tippaling eftir heima og njóta þess að fara með stelpurnar okkar í sædýrasafnið, kids museum og maður minn - steikurnar sem við ætlum að stúta þarna um helgina.........
Við förum á morgun og komum heim á þriðjudagsmorgun.  Slauga setur kannski litla færslu hér inn á morgun áður en við förum.

Annars langar mig til að þakka öllum sem hafa skrifað inn á síðuna okkar frá því við skrifuðum hér síðast á mánudag.  Við vissum það svo sem, af fenginni reynslu, að við fengjum stuðning og vorum í raun soldið að sækjast eftir honum.  En ég veit ekki hvort þið öll þarna úti áttið ykkur á því hvað þið eruð að gera mikið fyrir okkur, hvað þið eruð okkur mikill stuðningur.  Við eigum bestu fjölskyldu, vini, kunningja og stuðningsmenn í heimi - trúið mér, við erum hrærð. 

Nú skulum við leggja leiðindaathugasemdir til hliðar og snúa okkur að því sem skiptir máli, okkur sjálfum og þeim sem okkur þykir vænt um - elskið hvort annað og þið verðið ekki svikin.  Komið fram við fólk eins og þið VILJIÐ láta koma fram við ykkur.  Ef einhver er ósanngjarn í ykkar garð, reynið þá að vera sanngjarnari í garð viðkomandi.  Í ljósi þess segi ég við þennan eina frekar ósátta:  Ég veit ekki hver þú ert og ætla ekki að komast að því.  Mér þykir það leitt að þú sért ósáttur en ég fyrirgef þér samt (þó þú hafir ekki beðið um það) og vona að þú finnir frið til að koma þeim hlutum í verk sem líklega eru nauðsynlegir þín og þinna vegna.

Kveðja
Óskar Örn

Loksins loksins

Það er mikið að mar er komin aftur í netheiminn, díssúss mar!!  Mér er bara búin að vera illt í puttunum síðustu daga að geta ekkert skrifað en ætla reyndar ekkert að skrifa núna, það kemur færsla seinna í dag.  Bíðið bara spennt eheh!!

Ennþá orðlaus

Óskar skrifar:
Við erum ennþá orðlaus.  En á þessari stundu erum við ekki orðlaus af hamingju yfir því hvað tónleikarnir heppnuðust vel og yfir því hvað við erum heppin að eiga marga góða að.  Hér inn á síðuna okkar kom athugasemd í morgun sem sló okkur eins og blaut tuska.  Það var leiðinda komment frá manneskju greinilega er ekki sátt við lífið.

Athugasemdin snérist um það að viðkomandi vildi fá að vita hvað við ætluðum að gera við þá peninga sem hafa safnast í tengslum við tónleikana.  Ástæða þess að viðkomandi setti inn þetta komment er að hann (skrifaði “einn ekki alveg sáttur” undir) frétti af því að við værum að kaupa okkur nýja íbúð.  Já það var nú mikið gott að það væri hægt að finna eitthvað til að kjammsa á, vona að einhver njóti þess.  Við höfum ekki nefnt það hér að við værum að fara að flytja.  Jú við sögðum frá því á tímabili að okkur langaði til þess en höfum ekki talað um það lengi.  Við höfum okkar ástæður fyrir því að við tölum ekki um það hér, ástæður sem tengjast Þuríði ekki neitt, ástæður sem tengjast tónleikunum ekki neitt, ástæður sem engum kemur við nema þeim sem hefur kjark í að tala við okkur undir nafni.

Hvað við ætlum að gera við peningana!
Í auglýsingu fyrir tónleikana kom fram að þeir væru haldnir Þuríði til heiðurs og átti ágóðinn að renna til hennar og okkar fjölskyldu hennar til að gefa okkur færi á að eiga góðar stundir saman og það er einmitt það sem við ætlum að gera.  Þetta mun svo sannarlega hjálpa okkur að gera góða hluti fyrir okkur og dóttur okkar, hluti sem hjálpa okkur að búa til fallegar minningar.   
“Einn ekki alveg sáttur” skrifaði m.a.:
Eins og ég finn nú til með ykkur vegna hennar Þuríðar, þá verð ég bara að segja að mér finnst eins og þið fáið hreinlega allt (annað) sem að þið viljið, það eru nú ekki margir í ykkar aðstöðu sem gætu gert það sem þið hafið gert.Sem betur fer eigum við svo góða að, yndislegt fólk eins og Hönnu Þóru, Önnu Björk, Pálma og alla hina sem hafa stutt svo dyggilega við bakið á okkur að við getum gert hluti sem margir í okkar stöðu hafa ekki getað gert – hluti sem okkur dreymir um en ráðum ekki við m.a. vegna fjárskorts.

Við vitum ekki hvernig við getum svarað svona athugasemdum öðruvísi.  Við ætlum ekki að setja skýrslu hér inn á netið þar sem við skýrum nákvæmlega í hvað þessir peningar fara.  En við getum fullvissað ykkur um að þeir hjálpa okkur til að gera hluti sem við annars hefðum ekki gert, peningarnir færa okkur ekki hamingju einir og sér en þeir hjálpa svo sannarlega til að láta okkur líða betur.Kveðja Óskar Örn

Áslaug Ósk skrifar:
Ég var einmitt nýbúin að segja við frændfólk okkar á Ólafsfirði (jebbs ég er kanski skyld ykkur líka ehe, þar sem pabbi er þaðan og er að kanna málið) að mar þorði ekki að fara í kringluna útaf svona fólki til að kaupa mér bol sem nota bene ég geri nær aldrei því þá færi Gróa afstað og ég fann það líka á mér að hún færi afstað eftir tónleikana. Hvað er að fólki?

Ég vaknaði í morgun og mér leið ömurlega þar sem Þuríði minni líður ekki vel þessa dagana, við finnum hvað hún er að slappast og ég finn svo hræðilega til í hjartanu og hvað þá að fá svona komment.  Ég t.d. hágræt þegar ég er að skrifa þetta, hann Pálmi prestur kom til okkar á föstudagskvöldið og það var æðislegst að fá hann ekki það að ykkur komi það eitthvað við að hann hafi komið en mér finnst einsog sumum finnist þurfa vita ALLT sem við gerum, fáum og hvað við borðum.  Hann t.d sagði við okkur að við ættum að drífa okkur í burtu og nota sæluvímun frá tónleikunum og njóta þess að vera saman, fara í hitan og leika aðeins við börnin okkar á meðan allir væru ferðafærir þá var hann að sjálfsögðu að meina hana Þuríði mína. 

Að sjálfsögðu langar okkur það en þá kemur svona fólk einsog þetta komment í morgun sem við eyddum því okkur fannst það ekki eiga heima hérna á síðunni og þá fer það að babbla og babbla sem tekur ótrúlega mikið á taugarnar og mér finnst það líka ótrúlega sárt að lesa svona eða heyra.

Já Þuríði minni líður ekki vel, hún t.d tók smá öskurskast á laugardagskvöldið sem við höfum aldrei verið vitni af, tók eitt kast og svo var það búið og stúlkan sofnaði.  Það var einsog hún væri eitthvað að kveljast og þyrfti að fá smá útrás, það var ótrúlega skrýtið að sjá þetta og erfitt. 

Mér finnst svo sárt og erfitt að sjá hana svona hvað þá að viðurkenna að hún er eitthvað að slappast að hugsa útí næstu mánuði finnst mér óhugsandi.

Ég get eiginlega ekki skrifað meir þar sem ég er bara útgrátin, gjörsamlega dofin en þetta er samt ástæða fyrir mig og mína að loka síðunni og hafa lykilorð og bara útvaldir fái aðgang.  Ætla að hugsa málið, jú ég veit að það er endalaust margir að fylgjast með en ég get ekki hugsað mér að fá svona ótrúlega leiðinleg komment aftur og þetta er ekki í fyrsta skipti.

Munið að knúsa og kyssa börnin ykkar vel og lengi og ekki gleyma að segja þeim hvað þið elskið þau mikið, ég geri þetta allt oft á dag.

Elsku pabbi

Elsku pabbi minn á afmæli í dag, karlinn er 55ára í dag þannig það verður stórveisla á Dragó í dag og ég get ekki beðið eftir að fá smá kræsingar tilefni dagsins.  Slurp slurp!!

Elsku pabbi til hamingju með þennan stóra áfanga, hlakka til að fara með þér í næstu London-ferð eða réttara sagt bíð ég eftir því að þú segir mér hvenær við ætlum að fara næst eheh!!  Alltaf reddí!!

Þú ert bestur!!
Áslaug, Óskar, Þuríður Arna, Oddný Erla og Theodór nafni þinn Ingi

Stutt í dag ....eða kanski ekki?

Mig langaði nú bara að byrja á því að segja að hann Theodór minn Ingi litli pungur sem er rúmlega níu mánaða gamall tók þrjú skref í gær og ég er að fara úr monti eheh!!   Hann varð líka svakalega montinn og klappaði mikið fyrir sjálfum sér þegar hann sá hvað mamma hans og pabbi voru glöð með strákinn sinn.  Reyndar hefur mér funndist hann alltaf mikið letiblóð, tók hann svakalega langan tíma að snúa sér yfir á magan eða bara fara hreyfa sig yfir höfuð en hann vildi nú sýna múttu sinni það að hann væri sko ekkert letiblóð.  Ohh það var svo gaman að sjá hann gera þetta og hvað hann var montinn sjálfur og hló líka mikið, kanski verður hann bara farinn að labba fyrir jól einsog pabbi hans hefur alltaf sagt?  Hmmm!!  Vona samt ekki því við erum í veðmáli eheh!!

Enn og aftur þakkir til ykkar allra sem komu á tónleika ég er ennþá orðlaus, það var/er æðislegt að sjá hvað margir hugsa til okkar og hvað við eigum marga góða að.  Ekkert endilega okkar nánasta, fólk sem við höfum kanski ekki talað við lengi eða gamlir skólafélagar, úr badmintoni, sundinu svo lengi mætti telja hafa sýnt okkur það að þau eru tilbúin að gera allt fyrir okkur.  Stundum á ég eiginlega ekki til orð hvað við erum heppin að eiga ykkur öll að þið hafið hjálpað okkur endalaust mikið.  Knús fyrir það!!

Ég er svo ánægð hvað Þuríður mín var hress á tónleikunum og hvað ég var glöð að hún krampaði ekki neitt, hjúkket!!  Æjhi mér finnst sjálf erfitt þegar hún er krampa hvað þá fólk sem hefur aldrei séð hana krampa.  Ég veit það getur reynt mjög mikið á þá sem hafa aldrei séð hana í krampa sem við höfum verið vitni af síðustu vikur og mér finnst það líka doltið erfitt þannig ég er mjög ánægð hvað hún var glöð og hress.

Hún er loksins að byrja í sjúkraþjálfun en það byrjar í næstu viku, það  verður gott og gaman fyrir hana að fá aðeins að hreyfa sig.  Held að hún eigi að fá að fara í sund líka sem hún elskar útaf lífinu, ohh ég er frekar spennt að fá að fara með hana.

Well ætli mín verði ekki að hætta, við Theodór ætlum að skreppa útí TBR og horfa á alþjóðlega mótið sem er í gangi þar og hitta liðið okkar líka, frekar langt síðan ég hef hitt það. 

Bið að heilsa ykkur öllum og höldum áfram að knúsast, góða helgi!!

Myndir

Komnar inn nokkrar myndir frá tónleikunum í gær, var ekki í stuði að setja of margar þar sem myndakerfið hjá Barnalandi er ekki að gera sitt besta. grrrrrr!!

Við erum orðlaus

Óskar skrifar

Við erum nánast orðlaus en ætlum þó að reyna að koma frá okkur nokkrum þakkarorðum.

Tónleikarnir í gær voru hreint út sagt dásamlegir.  Tónlistarfólkið sem kom fram átti sannkallaðann stórleik.  Hanna Þóra, Ólöf Inga, Garðar Örn, Signý, Jóhann Friðgeir, Regína Ósk, Halla, Solla, Stebbi og Eyfi og allir undirleikararnir - bestu þakkir til ykkar allra fyrir frábæra frammistöðu.  Tæknimenn á staðnum, Sveinn Ómar, Einar Karl og aðrir fá sömuleiðis bestu þakkir fyrir sitt framlag.
Sérstaklega vil ég þó þakka þeim Önnu Björk, Pálma og Hönnu minni (aftur ) fyrir ómetanlega vináttu og stórkostlega tónleika. 

Þið sem komuð á tónleikana eða hafið stutt okkur með öðrum hætti síðustu daga og viku; Við eigum ekki orð til að lýsa því hvað við erum þakklát fyrir stuðning ykkar.  Allir segja við okkur að við séum að borga það til baka með viðhorfi okkar en við gerum ekkert annað en að fylgja hjarta okkar og reynum að taka því sem að okkur er rétt, læra af því og nýta til að okkur líði sem best, í dag og alla daga í framtíðinni.

Takk allir fyrir að snerta hjörtu okkar.

Mér líður vel

Óskar skrifar


Mér líður vel því að ég hef kynnst svo dámsamlegum hliðum á mannfólkinu.
Mér líður vel því að ég á svo yndislega konu
Mér líður vel því að ég á svo yndislega falleg og góð börn
Mér líður stórkostlega því að ég á fjögurra ára dóttur sem, af engu tilefni, tekur utanum hálsinn á mér og hvíslar að mér:  "Svona, svona pabbi minn - þetta er allt í lagi".

Takk fyrir daginn í dag og takk fyrir að láta mér líða vel.

Kveðja
Óskar Örn

Síminn

Mig langaði bara að láta ykkur vita að heimasíminn okkar er bilaður, hann nebbla stoppar ekki hérna á heimilinu og mér finnst frekar óþægilegt að geta ekki svarað.  Grrrrr!!  Hringja í gemmsan minn takk fyrir!!

Pizzu-partý

Þar sem Skari er að vinna frameftir kvöldi ákváðum við stelpurnar að vera með pizzu-partý, ætlum að panta okkur pizzu og hafa það notó og þær bíða svakalega spenntar eftir að mútta panti pizzuna eheh.  Annars erum við búin að vera á fullu í búðarleik, syngja og dansa ég er gjörsamlega búin á því ehehe!!  Sko þegar mar byrjar á einhverju á þessu heimili fær mar sko ekki að hætta, bara gaman!!

Það koma einn pjakkur til mín í morgun þegar ég sótti stelpurnar á leikskólann og fór að tala um tónleikana við mig, það er greinilegt að það er talað um Þuríði heima hjá þessum börnum sem mér finnst mjög gott.  Þau spurja líka mikið en hann var svakalega spenntur með þessa tónleika en vissi samt ekki alveg sjálfur hvort hann ætlði að mæta.  Svo var mér sagt í morgun að hann hefði komið til Þuríðar minnar og sagt "ertu með krabba Þuríður?".  Hún nottla bara horfði á hann og fannst ö-a bara frekar skrýtinn að spurja svona þannig hann hélt bara áfram "komdu með krabbann". Æjhi þau eru ótrúlega einlæg þessi börn og segja að sjálfsögðu allt sem þeim dettur í hug og auddah pæla þau mikið í þessum hlutum en mér fannst þetta bara fyndið.

Þið hafið væntanlega flest farið inná linkinn í fyrradag sem við settum inn vegna aðgerðar sem ein stúlka fór svona svipaða einsog Þuríður mín þyrfti að fara til að reyna hjálpa henni sem eru kanski frekar litlar líkur á því að hún myndi koma heil úr eða bara lifa af. Það var einhver "ókunnug" sem sendi okkur þennan link en okkur fannst þetta svolítið sérstakt þannig Skara var leynilögga í gær og hafði að grafa upp spítalann sem gerði þessa aðgerð og hringdi á spítalann til að fá meiri upplýsingar, segja svo að mar geti ekki bjargað sér.  Þannig hann fékk mailið hjá þessum ákveðna lækni og við erum búin að senda honum mail til að fá meiri upplýsingar og kannað þetta nánar.  Við erum reyndar búin að senda mail á læknana okkar hérna heima með þessum upplýsingum og hringdum í okkar lækni í gær og að sjálfsögðu vill hann kanna allt svona en ekki hvað?  

Við erum ennþá að bíða eftir svari frá Boston hvað þeir halda með stöðuna í dag, við erum náttúrlega heimsmeistarar í biðum því verr og miður samt óþolinmóðustu manneskjur í heimi.  Það er líka búið að hafa samband við þá í Svíþjóð og ath hvað þeir segja og við nottla höldum bara áfram að bíða. 

Þuríður mín hefur verið aðeins hressari í dag en í gær, búin að krampa smávegis og ég varð reyndar doltið hrædd áðan þegar hún krampaði því hún varð eitthvað svo rauð í augunum og hvítnaði svo mikið en hún lítur betur út núna.  Hún sofnar reyndar alltaf fyrir kvöldmat og sefur þanga til við vekjum hana þegar hún þarf að fara í skólann þótt hún sofi tvisvar yfir daginn þannig hún er frekar orkulítil, annað kvöld verður víst að ráðast hjá henni.  Held samt að hún reyni allt til að halda sér vakandi enda mikil partý-kona.

Ætli ég haldi ekki áfram í búðarleik með krökkunum, Oddný að biðja mig að koma leika.